Pechamos o noso PDI e publicamos o noso ABC dos Coidados!

 

Celebramos a vida e obra de Luísa Villalta

Deixámosvos algunhas imaxes das diferentes actividades que fixemos nas escolas sobre a vida e obra de Luísa Villalta:

 

Semana do Libro e a Lectura

 Ao longo desta semana levamos a cabo diferentes actividades nas que pór en valor o mundo dos libros, os cales están sempre moi presentes no noso día a día. Sacamos os nosos contos favoritos ao patio, liberamos libros de expurgo para os lean outros nenos e nenas ou traballamos ao redor dos nosos libros favoritos. Aquí deixamos unha escolma de imaxes:

Carballo máxico. A nosa participación no Salón do libro de Carballo

Que é a maxia? 

Se preguntamos ao noso alumnado,  mencionan nas suas respostas "ter poderes", "seres máxicos", "facer desaparecer cousas"... Onde está a maxia? "Na noite de Reises", "cando vén o Rato Pérez", "no Samaín" Momentos e seres máxicos case universais. Pero... existen feitos máxicos na nosa contorna? Pois resulta que nos botamos a preguntar, mandamos notiña a casa e as familias contestáronnos que si, que en Carballo vivimos rodeadas de historias máxicas, de lendas e de encantos que fan desaparecer cousas, de meigas que se reúnen co demo para castigar a quen non cuida o monte, de trabes de ouro, de cidades sumerxidas e outras tantas historias que o noso alumnado, facendo MAXIA, convertiu en obxectos tridimensionais: metimos cada historia nunha caixa, a caixa-conto (proposta adaptada do colectivo Escola Imaxinada) e a partir da semana que vén poderedes visitalas no Salón do Libro de Carballo. Alí tamén podedes coñecer que é un taumatropo, ou como conseguimos facer maxia unindo dúas imaxes nunha 😉.

Moitas grazas a todas as familias e alumnado polo traballo de investigación levado a cabo, no que confirmamos que si, que Carballo ten moita maxia, e que está nas nosas mans seguir mantendo viva a nosa tradición oral para que nunca se perda! ✨

187 anos de Rosalía de Castro

 O 23 de febreiro todas as escolas do CRA Ponte da Pedra celebramos o aniversario de Rosalía de Castro, hai 187 anos. Aproveitando o noso PDI, Coidámonos cos cinco sentidos, e máis concretamente o traballo centrado no coidado ás demais persoas, quixemos compartir coa veciñanza das nosas aldeas algúns dos seus poemas máis sonados. 

Ilustramos unha escolma de poemas:

E saímos buzonear polas nosas parroquias! 

Na esocoliña de Artes non perderon ocasión, e celebraron o aniversario da autora cun biscoito cheo de versos dun poema que o alumnado acabou por ordear. 

Grazas por tanto, Rosalía... e alá onde estés, feliz aniversario!

Día da nena na ciencia

 Na Escoliña de Mirón estiveron a traballar o Día da nena na ciencia (11 de febreiro) a través do conto "Ada, magnífica científica", no contexto de traballo de aula que están a facer sobre os diferentes inventos que cambiaron (e melloraron) a humanidade. 

A ciencia e a igualdade de xénero son vitais para alcanzar os ODS,  incluidos na Axenda 2030. Visibilizar o traballo das mulleres no ámbito científico e incluir as dificultades coas que se atopan, ademais de empoderar ás nenas nas competencias STEAM, é fundamental para acabar coa fenda de xénero nesta área. 

Palabras para quentar o corazón

 Nos días de inverno quentamos o noso corpo cunha mantiña,unha infusión ou unha sopa quente. Pero con que quentamos o noso corazón? As nenas e nenos do CRA conmemoramos o Día da paz e non violencia facendo un agasallo á comunidade, palabras que nos fan sentir ben, confortables, que nos quecen a alma. Agrupámonos entre as diferentes escolas nunha xornada de convivencia na que intercambiamos palabras que nos gusta escoitar e que pensamos que nos axudan a mellorar o noso día a día. Para espallar esta calor ao resto de persoas, colocamos estas palabras nuns botes repartidos por diferentes establecementos do concello de Carballo, coa esperanza de facer sentir ben á quen as recolla. 
Nestes tempos nos que diferentes guerras e conflictos inxustos cubren as portadas dos nosos xornais, queremos lembrar que só a palabra pode ser o camiño para o entendemento e a paz.

Recomendacións de Nadal - Grazas, Hemato!

 

Xornada de Bibliotecas Escolares de Galicia 2023

O pasado sábado 18 de novembro, asistimos ás Xornadas de Bibliotecas Escolares de Galicia, que xirou ao redor da banda deseñada como soporte para diferentes relatos, da ilustración como linguaxe poderosa... e do papel facilitador da biblioteca a través dos novas linguaxes e espazos, dos proxectos, do voluntariado, do fomento da lectura e da participación das familias... Unha cita anual na cal aprender, compartir e intercambiar experiencias con outros centros docentes de Galicia. Entre outras ponencias, foi un pracer escoitar a conferencia inaugural de Miguelanxo Prado, facendo un percorrido pola historia da banda deseñada, coñecer as experiencias da Biblioteca Escolar do CEIP de Outes ou participar no obradoiro de banda deseñada con Jorge Campos. 

Recomendacións lectoras para que algún día non sexa necesario un 25N