Peche do PDI: un curso explorando a flora e a fauna de Carballo

Hoxe pechamos un proxecto que nos acompañou ao longo de todo o curso: o noso PDI, no que nos mergullamos nunha aprendizaxe chea de aventuras sobre a fauna e a flora de Carballo. Foi un camiño fascinante no que descubrimos a riqueza natural da nosa contorna, investigamos, creamos e compartimos experiencias inesquecibles.

Para celebrar este peche, invitamos ás familias a compartir connosco un ratiño do último día de cole, onde cada aula presentou os produtos finais elaborados durante o proxecto. Os resultados foron tan diversos como enriquecedores: desde exposicións ata xogos de mesa. A ilusión das persoas asistentes reflectía o esforzo e a dedicación de todo o alumnado e profesorado ao longo do curso.

Este peche de proxecto non é un punto final, senón un paso máis na nosa aprendizaxe sobre o mundo natural. Queremos agradecer especialmente ás familias que colaboraron en pequenos proxectos de aula, á asociación Senda Nova e Vía inqueda polo seu apoio e ás librerías de Carballo que nos axudaron a enriquecer a nosa biblioteca. Grazas a todas as persoas que fixeron posible esta experiencia e contribuíron a que cada descubrimento fose único e especial. Seguiremos explorando e aprendendo!

Recomendacións lectoras de verán

Aquí tendes as nosas recomendacións para este verán que se achega! Libros fascinantes para acompañar as xornadas de sol na praia ou as de choiva na casiña. Gozade da lectura, compartide connosco as vosas impresións e, sobre todo, desfrutade duns días de descanso e felicidade. Boas vacacións!

Día Nacional das Linguas de Signos Españolas

Un ano máis, con motivo da celebración do Día Nacional das Linguas de Signos Españolas, o 14 de xuño, as escolas implicámonos nunha xornada de sensibilización arredor da diversidade comunicativa e cultural. Este ano fixémolo baixo o lema “As linguas de signos fannos máis fortes”, que nos convida a recoñecer o valor das linguas de signos como parte esencial da nosa sociedade.

Co apoio da documentación facilitada por Gema, a nosa intérprete de Lingua de Signos, cada grupo afondou na figura dunha persoa relevante para a comunidade xorda, coñecendo a súa traxectoria e o seu impacto na defensa dos dereitos lingüísticos e culturais. Esta aproximación permitiunos achegarnos a outras realidades desde unha perspectiva de respecto e recoñecemento, poñendo o foco na riqueza da diversidade.

Como parte da actividade, cada escola realizou un paseo pola contorna para repartir carteis informativos nos buzóns da veciñanza, dando a coñecer esta lingua e a súa importancia.

  

Foi unha xornada para aprender, compartir e seguir construíndo unha escola máis inclusiva 🤟

Descubrindo a contorna da man de Senda Nova

Durante estes días, o alumnado do CRA participou nunha actividade moi especial organizada en colaboración con Senda Nova e Vía Inqueda. Cada escola realizou unha saída pola súa contorna acompañada por Jose, guía e grande coñecedor do territorio, que nos foi revelando algúns dos pequenos tesouros naturais que temos ao noso redor.

Fixemos sendeirismo, escoitamos, observamos e aprendemos a mirar con outros ollos aquilo que moitas veces pasa desapercibido: unha planta autóctona, un camiño oculto ou os sinais da fauna que nos rodea.

Nalgúns casos, as condicións meteorolóxicas impediron facer a saída tal como tiñamos previsto, pero iso non nos detivo. Aproveitamos a ocasión para investigar sobre as pegadas de animais, coñecer as súas formas, características e como interpretalas, convertendo a aula nun laboratorio de aprendizaxe.

A experiencia serviunos para seguir cultivando a curiosidade, o respecto polo medio e o vínculo co lugar onde vivimos. Grazas unha vez máis a Senda Nova e a Jose por guiarnos con tanta paixón!

Letras Galegas 25. As cantareiras e a poesía popular

O 17 de maio celebramos unha das datas máis queridas do calendario escolar: o Día das Letras Galegas, unha ocasión para reivindicar a nosa lingua e o noso patrimonio cultural. Este ano, a Real Academia Galega dedicou a efeméride ás cantareiras e a poesía popular oral, recoñecendo o valioso legado destas mulleres na transmisión da tradición galega.

No CRA Ponte da Pedra quixemos sumar a nosa voz a esta homenaxe cunha actividade moi especial. Visitamos o Centro Cívico de Verdillo, onde vivimos unha mañá chea de música, alegría e emoción. Dúas integrantes do grupo Do Rivés e varias pandeireteiras da Asociación Arume compartiron connosco a historia das homenaxeadas e agasalláronnos cunha mostra de cantigas tradicionais que fixeron vibrar a todos os presentes.

Foi unha experiencia que nos conectou co noso pasado e nos animou a seguir coidando aquilo que nos fai únicas e únicos: a nosa lingua, a nosa música e a nosa cultura.

 

 

Agardamos por vós na próxima publicación, coa ilusión de seguir celebrando a nosa lingua e cultura!

Unha mañá especial na biblioteca: contacontos e formación de usuarios!

O pasado luns 12 de maio, o alumnado de Educación Primaria gozou dunha mañá moi especial na biblioteca central do CRA. 

Tivemos un contacontos do libro O Rabaño de Margarita del Mazo, historia que nos achegou ao mundo das ovellas que saltan valados para axudar a durmir ata que unha delas está farta desta rutina.

Logo de meternos na historia, iniciamos a formación de usuarios, onde aprendemos a movernos pola biblioteca e descubrir os seus recursos. Durante a sesión:

• Aprendemos a manipular as páxinas dos libros correctamente para conservar os materiais no mellor estado posible.
• Xogamos co titorial de formación de usuarios.
• Exploramos a CDU (Clasificación Decimal Universal), para entender a organización dos estantes dos libros.
• Desciframos as etiquetas dos tejuelos, identificando a información clave de cada exemplar.

Para reforzar todo o aprendido, participamos en dous xogos moi divertidos nos que asociamos portadas de libros cos seus tejuelos correspondentes e outro no que tivemos que localizar un libro concreto no estante, a partir do seu tejuelo.

Ao longo da xornada tamén utilizamos o material do Recuncho Argalleiro, experimentando e explorando novas formas de aprendizaxe dentro da biblioteca.

 

 

Por último, aínda nos deu tempo a facer préstamo de libros, levando con nós lecturas para seguir gozando da lectura. Se queres saber todos os libros cos que contamos para ver cales son os que che gustaría consultar, accede aquí ao noso catálogo.

A nosa biblioteca é un lugar de encontro, descubrimento e diversión. Seguimos explorando e aprendendo cada día!

Visita especial á nosa biblioteca: Verónica Bolón!

O pasado 12 de maio, tivemos a sorte de recibir na nosa biblioteca á científica carballesa Verónica Bolón, quen compartiu co alumnado de Primaria a súa paixón pola ciencia e a tecnoloxía.

Durante a charla, Verónica falounos sobre o seu traballo no campo da intelixencia artificial e a computación, explicando como a ciencia pode axudar a resolver problemas reais e mellorar a vida das persoas. O alumnado participou activamente, facendo preguntas e descubrindo curiosidades sobre o mundo da investigación.

Agardamos por vós na próxima publicación, sempre con ganas de seguir aprendendo!

Luces, cámara, acción... que vén o Salón!

Do 22 ao 30 de abril, celebrouse en Carballo a XVIII Semana do Libro e a Lectura. Este ano, a temática do Salón do Libro estivo aliñada coa do Salón do Libro de Pontevedra, dedicada ao mundo do cine baixo o lema "Luces, cámara, acción... que vén o Salón!".

Durante toda a semana, a Biblioteca Rego da Balsa acolleu unha exposición de traballos elaborados polo alumnado de diversos centros educativos do concello. O noso centro participou nesta edición cunha proposta moi especial: proxectores caseiros que mostraban ilustracións de flora e fauna da nosa contorna. Tivemos a oportunidade de participar, en horario de mañá, no contacontos baseado na historia de A pita xefa así como subir ao primeiro andar a ver a exposición.

Polas tardes, a biblioteca ofreceu diversidade de contacontos e obradoiros para todas as idades.

Foron días de aprendizaxe, cultura e diversión, onde a lectura e o cine compartiron protagonismo. Xa estamos desexando participar na próxima edición!

Podedes ver as actividades realizadas na biblioteca Rego da Balsa nesta publicación.

Material para as letras galegas 25

A Real Academia Galega acordou dedicar o Día das Letras Galegas 2025 á poesía popular oral, personificado en Adolfina e Rosa Casás Rama, de Cerceda, Eva Castiñeira Santos, de Muxía, e Manuela Lema, Teresa García Prieto e Prudencia e Asunción Garrido Ameixenda, integrantes estas catro das Pandeireteiras de Mens (Malpica). Unha homenaxe colectiva a todas aquelas mulleres que, coa súa voz e saber transmitido xeración tras xeración, fixeron medrar o noso patrimonio cultural.

Desde o equipo de dinamización da lingua galega elaborouse unha presentación moi traballada para poder afondar sobre a temática.

Tamén vos deixamos por aquí unha pequena recomendación lectora para animarvos.

 

Convidámosvos a celebrar a nosa lingua, a nosa música e a nosa identidade agora e sempre.

ArRÓUPAme na igualdade

 Exposición de traxes tradicionais de Galicia

Os días 22, 23 e 25 de abril, a biblioteca do CRA acolleu unha interesante exposición didáctica de traxes tradicionais de Galicia, que permitiu á comunidade educativa achegarse á riqueza do vestiario galego.

Esta iniciativa formou parte do proxecto "ArRÓUPAme na igualdade", galardoado co Premio Concepción Arenal 2024, e buscou non só dar a coñecer os traxes típicos da nosa terra, senón tamén reflexionar sobre a súa evolución e o papel que xogaron na sociedade.

Durante tres días, os visitantes puideron explorar as distintas pezas expostas, aprendendo sobre os tecidos, os deseños e os usos de cada traxe segundo a época e o contexto social. O horario de visita foi de 12:00 a 14:00 e de 16:00 a 18:00. Foi unha experiencia enriquecedora, na que a tradición e a historia se entrelazaron para achegar á comunidade educativa un pouco máis sobre as nosas raíces.

 

Ademais disto os asistentes tiveron a oportunidade de realizar préstamo de libros, houbo quen reclamaba por levar as mans cheas deles.

Grazas por participar nesta actividade, agardámosvos na seguinte!

Xuntanza literaria: O CPI de Zas visita a escola de Cances

Despois da nosa marabillosa visita ao CPI de Zas hai uns meses, chegou a quenda de acollermos o seu alumnado na escola de Cances. Foi un día cheo de momentos especiais, onde a lectura e as artes escénicas volveron ser o fío condutor da convivencia.

Comezamos cunha sesión de lecturas compartidas, onde o alumnado da ESO do CPI de Zas e os nosos estudantes gozaron de historias que espertaron a imaxinación e fomentaron o amor polos libros. A continuación, o alumnado de Sísamo primaria, ofreceunos unha fantástica representación teatral do conto da Mosca Chosca.

 

Para rematar a xornada, todos xuntos compartimos unha deliciosa merenda e desfrutamos de xogos tradicionais que fortaleceron aínda máis os lazos entre os nosos centros.

O noso desexo é que estas xuntanzas continúen nos próximos cursos, porque cada encontro reforza a importancia de aprender en comunidade e de celebrar a maxia da lectura. Grazas ao alumnado e profesorado do CPI de Zas por esta experiencia tan enriquecedora. Agardamos a vosa próxima reunión!

Recomendacións lectoras de primavera

Aquí tendes as nosas recomendacións para esta luminosa estación primaveral. Libros marabillosos para acompañar os días de sol e as tardes de choiva. Gozade con eles e compartide connosco as vosas impresións!

Mochilas viaxeiras

Comezan a circular polas aulas as nosas mochilas viaxeiras. Chegará a todas as casas antes de que remate o curso, polo que agardade a vosa quenda para poder gozar delas. Cada unha leva: tres libros; un xogo de mesa; instrucións para o alumnado; e un caderno viaxeiro no que poderedes deixar comentarios, debuxos, fotografías e impresións sobre o seu contido e unha folla de recomendacións dirixidas ás familias para que poidades pedir prestados da biblio algún libro que vos interese.

Agardamos aproveitedes ao máximo esta iniciativa e que teñamos que mercar moitos máis libros, tanto para os nenos e nenas como para nós para poder seguir nutrindo estas mochilas.

Un saúdo e lede moito!

Exemplo de mochila viaxeira

Alice Guy: A pioneira do cine que a historia quixo esquecer

O Concello de Carballo invitou ao alumnado de 1º e 2º de primaria a unha actividade especial no Pazo da Cultura para conmemorar o 8M (Día Internacional da Muller), centrada na figura de Alice Guy, pioneira do cine e primeira directora da historia.

Tivemos a oportunidade de descubrir a vida e obra de Alice Guy, unha das primeiras persoas en entender o potencial narrativo do cine. Dirixiu e produciu máis de 1000 películas ao longo da súa carreira. A pesar diso, o seu traballo foi infravalorado e invisibilizado nunha industria dominada por homes, e moitas das súas contribucións foron atribuídas a outros cineastas.

Actividades coma esta axudan a reivindicar o seu traballo así como inspirar ás novas xeracións.