Experimenta... mais en galego! O noso mes da ciencia

Durante o mes de novembro celebramos no cole o Mes da Ciencia en Galego, unha ocasión perfecta para descubrir, investigar e sorprendernos… pero tamén para reflexionar sobre como facemos ciencia e quen a fai.

Este ano recibimos unha visita moi especial: Cienciña, unha pequena científica que chegou dende a nosa Biblio cunha mensaxe moi importante. Contounos que ás veces parece que a ciencia non fala galego… e que, se buscamos ben, tamén descubrimos que non hai tantos libros científicos escritos por mulleres. Por iso pediu a nosa axuda, para demostrar que a ciencia tamén pode estar en galego e que as nenas e as mulleres teñen moito que dicir neste eido.

A partir da súa carta puxémonos mans á obra: co material que Cienciña nos deixou nas aulas, comezamos a observar, preguntar e experimentar. 

Ademais, aproveitamos para coñecer mellor a biblioteca do centro. Comprobamos que hai pouca bibliografía en galego e que a presenza de autoras científicas é menor do que nos gustaría. Isto animounos aínda máis a continuar este camiño: lendo, investigando e creando contidos propios na nosa lingua.

Grazas a Cienciña e ao entusiasmo do alumnado, novembro converteuse nun mes cheo de curiosidade, aprendizaxes e experimentos. Agora sabemos que todas e todos podemos ser científicas e científicos, e que o galego é unha ferramenta perfecta para seguir descubrindo o mundo.

Aquí vos deixamos unha pequena documentación gráfica destas experiencias, que recollen o traballo, o esforzo e, sobre todo, a ilusión coa que vivimos este Mes da Ciencia en Galego.

Seguimos experimentando… e sempre, sempre, máis en galego!

Novidades novembro

Este mes de novembro, incorporamos á biblioteca escolar unha excelente selección de libros de investigación que enriquecerán o noso coñecemento en diversas áreas, especialmente de corpo humano e arte. 

Non volo perdades! Xa están dispoñibles para consulta e préstamo (recordade que a biblioteca está aberta a toda a comunidade educativa os luns á tarde, de 18 a 19 horas). 

Logo podedes compartir con nós as vosas impresións e opinións. 

Lecturas para o 25 de novembro

Este mes a nosa biblioteca énchese de cores, palabras e emocións para celebrar unha data moi especial: o 25 de novembro, Día Internacional contra a Violencia de Xénero.

Queremos aproveitar este momento para encher as aulas de historias que sementen igualdade, respecto e amizade. Porque os contos tamén poden axudar a cambiar o mundo, a ensinar que ninguén é máis ca ninguén e que todas as persoas temos dereito a ser tratadas con cariño e respecto.

Nesta semana tan importante, convidámosvos a ler, escoitar e compartir contos que nos falan de nenos e nenas valentes, libres e soñadoras, que non teñen medo de ser quen son nin de loitar polo que cren.

Novembro: mes da ciencia en galego

A Consellería de Cultura, Educación, Formación Profesional e Universidades, en colaboración coa Secretaría Xeral de Política Lingüística, ven impulsando a celebración anual do mes de novembro como o MES DA CIENCIA EN GALEGO NAS BIBLIOTECAS.

Dende a nosa biblio, queremos sumar esforzos para espallar o coñecemento científico en galego, espertar a curiosidade e fomentar o espírito investigador entre o noso alumnado. A ciencia axúdanos a comprender mellor o mundo que nos rodea, e tamén nos ensina a facer preguntas, buscar respostas e non deixar nunca de aprender.

Ao longo deste mes, propoñeranse diferentes recursos, experimentos e lecturas para descubrir que a ciencia tamén fala galego e que todas e todos podemos ser pequenos e pequenas científicas.

En palabras de Marie Curie: “na vida non hai nada que temer, só cousas que comprender”. Que mellor maneira de comprender o mundo que facelo na nosa lingua?

Na nosa biblio podes atopar algúns exemplares cheos de ciencia e curiosidade, para descubrir que aprender tamén pode ser unha aventura. Temos contos, inventarios e moitas historias agardando por ti; entre elas, podes atopar algunhas como:

E moitas máis! Achégate a coñecelas!

Enlaces de interese

Selección de libros informativos sobre ciencia editados en lingua galega

Xornal de ciencia: Gciencia

Libros e unidades didácticas descargables

Blogues de ciencias

Recursos dixitais

Blogue: O recuncho das ciencias

Recursos para traballar en galego

Recursos, actividades divulgativas e propostas de ciencia

Lecturas para acompañar o camiño educativo das familias

Na nosa biblioteca non só hai contos, aventuras e historias cheas de fantasía para as nenas e nenos. Tamén atoparedes un espazo de lectura e reflexión para as familias, con libros de pedagoxía, educación e psicoloxía, pensados para acompañar o camiño da crianza, ofrecer recursos útiles e axudar a comprender mellor cada etapa do desenvolvemento infantil.

Os luns, as familias podedes levar estes libros en préstamo durante un mes, para ler con calma, gozar da lectura e poñer en práctica aquelas ideas que vos resulten máis útiles e inspiradoras.

Queremos que a biblioteca sexa un lugar de encontro, crecemento e aprendizaxe compartida entre toda a comunidade educativa. Achegádevos e descubride todas as novidades que vos están agardando.

Preme erriba da imaxe para acceder á listaxe de libros.

A biblio do CRA ábrese á comunidade educativa!

Abrimos as portas da biblioteca do CRA Ponte da Pedra a todas as persoas que formamos parte desta gran comunidade: nenas e nenos, familias e profesorado.

Un espazo cheo de maxia, curiosidade e aprendizaxe, onde cada libro agocha novas aventuras por descubrir, novos mundos por explorar e mil historias que agardan por ti.

Vémonos todos os luns, de 18:00 a 19:00, para compartir xuntos momentos especiais entre miles de páxinas, conversas, sorrisos e descubrimentos.

No cartel que segue atoparedes as normas da biblioteca. Lembrade respectalas sempre que a visitemos, para manter un espazo acolledor, agradable e aberto a todas e todos.

Visitamos a biblioteca do CRA

Con motivo da conmemoración do día das bibliotecas (o 24 de outubro), ao longo desta semana, todo o alumnado de todas as escolas fixemos unha visita á nosa biblioteca, ubicada na sede do CRA. Cada grupo-aula pasou alí unha xornada completa, realizando actividades variadas, relacionadas co funcionamento da biblioteca e co PDI:

Coñecemos a biblioteca e a súa organización, así como as normas de convivencia da mesma.

• Elaboramos o noso punto-libro, que logo empregaremos nas visitas que fagamos á biblioteca polas tardes coas nosas familias e que nos permitará saber onde colocar os libros que imos mirando.
• Contamos contos e miramos e lemos libros.
• Xogamos cos materiais do recuncho argalleiro.
• Aproveitamos para visitar o mural que nos dou "entrada" á biblioteca, pintado na parede do edificio da sede, así como outros murais de Carballo.
• Convertémonos en grandes artistas, facendo unha representación do mural da sede.

Feliz día das bibliotecas a todas e todos!

 

  

Poñemos en marcha o PDI deste curso

Durante estas últimas semanas comezamos a traballar sobre o PDI deste curso, en colaboración coas familas. 

Todo comezou coa recepción dunha carta que contiña as pezas dun crebacabezas... que resultou ser un mural ubicado no noso concello. A  esta carta seguírona outras dúas: unha na que nos animaban a investigar sobre ese mural, coa axuda das familias (e cubrir unha ficha técnica); e unha última carta na que nos convidan a visitar a biblioteca do noso CRA durante unha xornada enteira! E iso será o que faremos a vindeira semana, pois o día 24 é o día das bibliotecas.

    

Libros que van e veñen

Hoxe comezamos co préstamo de libros das bibliotecas de aula: libros que van e veñen, nas bolsas que cada alumna e alumno teñen na súa aula para tal fin.

Este primeiro día, incluímos tamén un díptico para as familias, para axudarvos a sacarlle o máximo proveito á actividade e tamén algunhas indicacións do funcionamento (días de ida e volta, normas, recomendacións...).

Boa lectura a todos e todas!

 

Estamos no PLAMBE! Un novo capítulo para a nosa biblioteca escolar

Temos unha nova que nos enche de ilusión: o noso centro foi seleccionado como centro de nova incorporación ao PLAMBE (Plan de Mellora de Bibliotecas Escolares)! Este recoñecemento supón un impulso moi importante para a nosa biblioteca, que se enriquece con novos recursos, formación e propostas para seguir medrando como espazo de aprendizaxe, creatividade e encontro.

Grazas ao PLAMBE, poderemos ofrecer máis actividades, mellorar os fondos bibliográficos e fomentar aínda máis o gusto pola lectura entre todo o alumnado. Estamos desexando compartir con vós esta nova etapa chea de proxectos e sorpresas.

📖 Seguide atentos ao blog, porque isto só acaba de comezar!

Novidades outubro

Xa están aquí as novidades lectoras de outubro. Historias fresquiñas con contos que enganchan e libros de investigación que agardan a ser descubertos. Estade atentas e atentos, porque este mes a biblio encherase de propostas que vos van sorprender.

A aventura continúa con novas páxinas por explorar!

Mochilas viaxeiras 25/26

Esta semana botarán a andar de novo as Mochilas Viaxeiras. Para algunhas e algúns xa son coñecidas, pois comezaron a visitar os fogares o curso pasado.

Recordamos: en cada aula teremos unha Mochila Viaxeira que irá levando á casa todo o alumnado. Tan só tedes que esperar a vosa quenda! 

Cada unha leva: 4 libros e un xogo; instruccións; un caderno viaxeiro no que nos poderedes contar a vosa opinión sobre a actividade, (podedes incluír debuxos e fotografías da vosa experiencia coa mochila...), sobre o contido, facernos suxestións... Tamén se inclúe unha folla de recomendacións lectoras para as familias, para que poidades pedir prestado á biblioteca aquel libro que máis vos interese (asi mesmo, podedes consultar outros que temos dispoñibles, no catálogo Koha).

O obxectivo principal é fomentar e animar a lectura e o xogo en familia así como que vaiades descubrindo algúns materiais novos.

Boa viaxe a todas as mochilas!

Recomendacións de outono

Chega o outono e comeza a tempada de cores douradas, castañas e tempo húmido. Desde a biblio queremos acompañarvos nestes días cunha selección de lecturas que vos farán viaxar, soñar e descubrir mundos fascinantes.

Deixámosvos a continuación as nosas recomendacións lectoras para esta estación. Agardamos que vos gusten e, como sempre, convidámosvos a compartir connosco as vosas impresións. Gozade da lectura!

Volvemos con enerxía! Benvidas e benvidos ao curso 25/26

Inicia setembro e, con el, abrimos as portas a un novo curso cheo de ilusión. No CRA Ponte da Pedra xa estamos en marcha, organizando, preparando espazos e propostas que nos acompañarán ao longo dos próximos meses.

Deixámosvos aquí as novidades que temos na biblio para ir abrindo boca, pero haberá que esperar un chisquiño posto que ata outubro non comezará a funcionar o préstamo de libros.

Estamos a preparar todo con moito mimo para que sexa un espazo cheo de historias por descubrir. Estade atentas, porque pronto haberá novidades que vos van encantar!

Grazas por acompañarnos neste camiño e que comece a aventura!

Como escoller boas lecturas para a infancia: guía para familias

Para acompañar o noso compromiso coa lectura, compartímosvos unhas pequenas orientacións sobre como escoller libros de calidade para a infancia.

Nesta guía atoparedes fontes útiles e de confianza para descubrir lecturas de calidade para a infancia: desde catálogos de editoriais e recomendacións de organismos de referencia, até propostas de persoas expertas nas redes.

Agardamos que vos resulte útil e que contribúa a seguir construíndo un camiño lector cheo de experiencias e aprendizaxes!

Agora si, gozade do verán e esperámosvos en setembro.

Peche do PDI: un curso explorando a flora e a fauna de Carballo

Hoxe pechamos un proxecto que nos acompañou ao longo de todo o curso: o noso PDI, no que nos mergullamos nunha aprendizaxe chea de aventuras sobre a fauna e a flora de Carballo. Foi un camiño fascinante no que descubrimos a riqueza natural da nosa contorna, investigamos, creamos e compartimos experiencias inesquecibles.

Para celebrar este peche, invitamos ás familias a compartir connosco un ratiño do último día de cole, onde cada aula presentou os produtos finais elaborados durante o proxecto. Os resultados foron tan diversos como enriquecedores: desde exposicións ata xogos de mesa. A ilusión das persoas asistentes reflectía o esforzo e a dedicación de todo o alumnado e profesorado ao longo do curso.

Este peche de proxecto non é un punto final, senón un paso máis na nosa aprendizaxe sobre o mundo natural. Queremos agradecer especialmente ás familias que colaboraron en pequenos proxectos de aula, á asociación Senda Nova e Vía inqueda polo seu apoio e ás librerías de Carballo que nos axudaron a enriquecer a nosa biblioteca. Grazas a todas as persoas que fixeron posible esta experiencia e contribuíron a que cada descubrimento fose único e especial. Seguiremos explorando e aprendendo!

Recomendacións lectoras de verán

Aquí tendes as nosas recomendacións para este verán que se achega! Libros fascinantes para acompañar as xornadas de sol na praia ou as de choiva na casiña. Gozade da lectura, compartide connosco as vosas impresións e, sobre todo, desfrutade duns días de descanso e felicidade. Boas vacacións!

Día Nacional das Linguas de Signos Españolas

Un ano máis, con motivo da celebración do Día Nacional das Linguas de Signos Españolas, o 14 de xuño, as escolas implicámonos nunha xornada de sensibilización arredor da diversidade comunicativa e cultural. Este ano fixémolo baixo o lema “As linguas de signos fannos máis fortes”, que nos convida a recoñecer o valor das linguas de signos como parte esencial da nosa sociedade.

Co apoio da documentación facilitada por Gema, a nosa intérprete de Lingua de Signos, cada grupo afondou na figura dunha persoa relevante para a comunidade xorda, coñecendo a súa traxectoria e o seu impacto na defensa dos dereitos lingüísticos e culturais. Esta aproximación permitiunos achegarnos a outras realidades desde unha perspectiva de respecto e recoñecemento, poñendo o foco na riqueza da diversidade.

Como parte da actividade, cada escola realizou un paseo pola contorna para repartir carteis informativos nos buzóns da veciñanza, dando a coñecer esta lingua e a súa importancia.

  

Foi unha xornada para aprender, compartir e seguir construíndo unha escola máis inclusiva 🤟

Descubrindo a contorna da man de Senda Nova

Durante estes días, o alumnado do CRA participou nunha actividade moi especial organizada en colaboración con Senda Nova e Vía Inqueda. Cada escola realizou unha saída pola súa contorna acompañada por Jose, guía e grande coñecedor do territorio, que nos foi revelando algúns dos pequenos tesouros naturais que temos ao noso redor.

Fixemos sendeirismo, escoitamos, observamos e aprendemos a mirar con outros ollos aquilo que moitas veces pasa desapercibido: unha planta autóctona, un camiño oculto ou os sinais da fauna que nos rodea.

Nalgúns casos, as condicións meteorolóxicas impediron facer a saída tal como tiñamos previsto, pero iso non nos detivo. Aproveitamos a ocasión para investigar sobre as pegadas de animais, coñecer as súas formas, características e como interpretalas, convertendo a aula nun laboratorio de aprendizaxe.

A experiencia serviunos para seguir cultivando a curiosidade, o respecto polo medio e o vínculo co lugar onde vivimos. Grazas unha vez máis a Senda Nova e a Jose por guiarnos con tanta paixón!

Letras Galegas 25. As cantareiras e a poesía popular

O 17 de maio celebramos unha das datas máis queridas do calendario escolar: o Día das Letras Galegas, unha ocasión para reivindicar a nosa lingua e o noso patrimonio cultural. Este ano, a Real Academia Galega dedicou a efeméride ás cantareiras e a poesía popular oral, recoñecendo o valioso legado destas mulleres na transmisión da tradición galega.

No CRA Ponte da Pedra quixemos sumar a nosa voz a esta homenaxe cunha actividade moi especial. Visitamos o Centro Cívico de Verdillo, onde vivimos unha mañá chea de música, alegría e emoción. Dúas integrantes do grupo Do Rivés e varias pandeireteiras da Asociación Arume compartiron connosco a historia das homenaxeadas e agasalláronnos cunha mostra de cantigas tradicionais que fixeron vibrar a todos os presentes.

Foi unha experiencia que nos conectou co noso pasado e nos animou a seguir coidando aquilo que nos fai únicas e únicos: a nosa lingua, a nosa música e a nosa cultura.

 

 

Agardamos por vós na próxima publicación, coa ilusión de seguir celebrando a nosa lingua e cultura!

Unha mañá especial na biblioteca: contacontos e formación de usuarios!

O pasado luns 12 de maio, o alumnado de Educación Primaria gozou dunha mañá moi especial na biblioteca central do CRA. 

Tivemos un contacontos do libro O Rabaño de Margarita del Mazo, historia que nos achegou ao mundo das ovellas que saltan valados para axudar a durmir ata que unha delas está farta desta rutina.

Logo de meternos na historia, iniciamos a formación de usuarios, onde aprendemos a movernos pola biblioteca e descubrir os seus recursos. Durante a sesión:

• Aprendemos a manipular as páxinas dos libros correctamente para conservar os materiais no mellor estado posible.
• Xogamos co titorial de formación de usuarios.
• Exploramos a CDU (Clasificación Decimal Universal), para entender a organización dos estantes dos libros.
• Desciframos as etiquetas dos tejuelos, identificando a información clave de cada exemplar.

Para reforzar todo o aprendido, participamos en dous xogos moi divertidos nos que asociamos portadas de libros cos seus tejuelos correspondentes e outro no que tivemos que localizar un libro concreto no estante, a partir do seu tejuelo.

Ao longo da xornada tamén utilizamos o material do Recuncho Argalleiro, experimentando e explorando novas formas de aprendizaxe dentro da biblioteca.

 

 

Por último, aínda nos deu tempo a facer préstamo de libros, levando con nós lecturas para seguir gozando da lectura. Se queres saber todos os libros cos que contamos para ver cales son os que che gustaría consultar, accede aquí ao noso catálogo.

A nosa biblioteca é un lugar de encontro, descubrimento e diversión. Seguimos explorando e aprendendo cada día!