E chegou o último día de clase, deses que mesturan a alegría da celebración coa emoción de mirar cara atrás e decatarse de todo o vivido ao longo do curso.
Quixemos despedir este curso tan especial celebrando xuntos coa romaría de fin de curso, unha xornada chea de arte e música, arredor do noso PDI Derrubando muros.
Ao longo da mañá, o alumnado converteuse en artista, músico, bailarín, construtor e creador. Tivemos a enorme sorte de contar con Rakele Cavallo, coa que elaboramos un mural colectivo que quedará para sempre, na escola de Rega, como símbolo de todo o que fomos construíndo durante este camiño. Houbo ritmo con beatbox e baile urbano; imaxinación nas construcións co sistema Lupo; e moita cor e creatividade nos murais efémeros realizados con tizas.
Tamén tivemos o privilexio de escoitar a Vero Rilo coas súas historias, que sempre son un acerto.
E, como non podía ser doutro xeito, quixemos compartir esta despedida coas familias, que son unha parte fundamental da nosa comunidade educativa. Grazas por acompañarnos, por visitar a exposición do noso PDI, por compartir conversas, despedidas e un delicioso chocolate con churros que soubo a celebración.
Hoxe pechamos un curso, pero levamos connosco moito: experiencias compartidas, aprendizaxes, emocións, amizades e a certeza de que a arte ten o poder de unir, de abrir camiños e, sobre todo, de derrubar muros.
Grazas, de corazón, a todas as familias por camiñar ao noso lado un curso máis. Grazas ao alumnado por enchernos cada día de aprendizaxe. E, tamén grazas ao profesorado, por traballar en equipo para seguir facendo escola.
Despedímonos ata setembro co corazón cheo.
Viva a arte urbana!
