Mochilas viaxeiras

Comezan a circular polas aulas as nosas mochilas viaxeiras. Chegará a todas as casas antes de que remate o curso, polo que agardade a vosa quenda para poder gozar delas. Cada unha leva: tres libros; un xogo de mesa; instrucións para o alumnado; e un caderno viaxeiro no que poderedes deixar comentarios, debuxos, fotografías e impresións sobre o seu contido e unha folla de recomendacións dirixidas ás familias para que poidades pedir prestados da biblio algún libro que vos interese.

Agardamos aproveitedes ao máximo esta iniciativa e que teñamos que mercar moitos máis libros, tanto para os nenos e nenas como para nós para poder seguir nutrindo estas mochilas.

Un saúdo e lede moito!

Exemplo de mochila viaxeira

Alice Guy: A pioneira do cine que a historia quixo esquecer

O Concello de Carballo invitou ao alumnado de 1º e 2º de primaria a unha actividade especial no Pazo da Cultura para conmemorar o 8M (Día Internacional da Muller), centrada na figura de Alice Guy, pioneira do cine e primeira directora da historia.

Tivemos a oportunidade de descubrir a vida e obra de Alice Guy, unha das primeiras persoas en entender o potencial narrativo do cine. Dirixiu e produciu máis de 1000 películas ao longo da súa carreira. A pesar diso, o seu traballo foi infravalorado e invisibilizado nunha industria dominada por homes, e moitas das súas contribucións foron atribuídas a outros cineastas.

Actividades coma esta axudan a reivindicar o seu traballo así como inspirar ás novas xeracións.

Antroidamos cos madamitos

Este ano, por terceiro ano consecutivo, desde o CRA reafirmamos o noso compromiso coa recuperación e posta en valor do Entroido tradicional, unha das festas máis arraigadas na nosa cultura. Para iso, contamos coa colaboración da Asociación Escola do Alprende de Oza, que leva anos traballando na comarca de Bergantiños pola recuperación desta celebración popular.

Esta asociación, con sede en Carballo, dedícase á ensinanza do baile e da música tradicional, así como á xestión cultural vinculada á nosa tradición. Nesta edición, lucíronse pezas recuperadas especificamente da parroquia de Cances, co protagonismo dos madamitos, figuras propias do Entroido local recuperadas grazas ao seu labor de investigación.

Foi unha celebración chea de diversión, identidade e música. Un paso máis na nosa aposta por manter vivas as tradicións e facer que formen parte da vida de toda a comunidade educativa.

Herbario de Rosalía: arte, natureza e poesía

Arte, natureza e poesía: flora e fauna de Carballo da man de Rosalía

Continuamos a encher os espazos de vida, cor e aprendizaxe. Grazas ao equipo de dinamización da lingua galega, inspirámonos no libro O herbario de Rosalía, unha obra que recolle a pegada da natureza na poesía de Rosalía de Castro, quixemos render homenaxe ás especies humildes que nos rodean, dándolles vida a través da arte.

Cada pincelada foi unha oportunidade para coñecer mellor as plantas do noso territorio, para traballar en equipo e para deixar pegada da nosa mirada sobre o mundo natural. O resultado nutre agora a nosa biblioteca, poñéndolle cor, xa que a arte tamén é unha forma de investigar, de expresarse e de coidar o que temos preto.

Grazas a todo o alumnado e profesorado por facer posible esta marabilla!

 

Achégate á biblio para ver o noso particular herbario!

Meco Rosaliano

O tempo de entroido xa chegou, descubride os mandadiños desta semana da man de Rosalía de Castro.

LUNS                     MARTES                    MÉRCORES                    XOVES                    VENRES

11F: Día Internacional da Muller e a Nena na Ciencia

O día 11 de febreiro conmemórase o Día Internacional da Muller e a Nena na Ciencia. O fin de darlle visibilidade a este día é o de conseguir unha maior participación das mulleres e as nenas en contextos científicos e así eliminar a brecha de xénero nos ámbitos STEAM (Ciencia, Tecnoloxía, Enxeñería, Artes e Matemáticas).

O Concello de Carballo puxo en marcha unha exposición titulada "Mulleres guerrilleiras: investigadoras de Carballo" á que vos podedes achegar ata o día 8 de marzo.

Durante este mes, no CRA Ponte da Pedra achegámos os experimentos científicos ás nosas aulas. Observamos a través do microscopio dixital, probamos a tensión superficial, vimos radiografías e mesmo probamos tintes naturais extraídos de plantas, toda unha aventura!

Ademais disto, tamén tivemos a oportunidade de facer unha visita a un dos museos científicos da cidade da Coruña, nada máis e nada menos que a Casa das Ciencias. 

Para poder ver outras actividades que se fixeron en distintos centros da nosa comunidade e atopar máis información, podedes consultar o blog das Bibliotecas Escolares de Galicia.

Agardámosvos na próxima publicación e esperámosvos experimentando.

Formación de usuarios

Temos moitas gañas de que conozades a fondo a nosa biblioteca. Deixámosvos unha pequena presentación do seu funcionamento.

 

Álbum do PDI

🍃 Xa temos o noso álbum de flora e fauna de Carballo! 🐾

É un pracer anunciar que o CRA Ponte da Pedra xa conta cun recurso moi especial para seguir coñecendo e valorando a contorna: o noso Álbum de Flora e Fauna de Carballo.

Este álbum nace como parte do noso PDI e está pensado para axudarnos a recoñecer, identificar e aprender sobre as especies máis destacadas do noso territorio. Cada imaxe vai numerada e pode pegarse no seu lugar correspondente, convertendo cada actividade nun pequeno reto de investigación e observación.

  

Ademais de ser unha ferramenta educativa, é tamén unha forma divertida de camiñar polo noso medio natural con ollos curiosos, recollendo pegadas de coñecemento en cada páxina. Nas últimas follas tamén poderemos engadir aquela flora e fauna que temos na contorna das escolas, temos todo un reto por diante.

Acompañádenos a e encher xuntos este álbum de descubrimentos!

Recomendacións lectoras de inverno

Quedan aquí as recomendacións para este frío mes de Xaneiro, gozade con elas e compartídenos a vosa opinión.

Visita de letras ao CPI de Zas

Esta semana, as escolas de Cances, Sísamo e Xoane, tivemos a sorte de visitar o CPI de Zas nunha convivencia lectora do máis divertida. Acolléronnos cunhas lecturas dirixidas polo alumnado de 1º ciclo de primaria e logo puidemos gozar dunha marabillosa obra de teatro escrita e interpretada polo alumnado de secundaria. Organizaron unha merenda deliciosa chea de froita, iogur natural e biscoitos da casa para logo seguir xogando todos xuntos.

Con xuntanzas así quédanos claro que a lectura pode ser un punto de conexión de grande importancia entre o alumnado de distintas idades e centros.

Grazas ás persoas que forman parte do CPI de Zas por facer posible esta visita, agardamos que poidades vir a vernos para o próximo ano!

*Actualización: Podedes ver a publicación do CPI de Zas sobre este día no seu Instagram.

Visita do Apalpador co programa “Espías do bosque”

Estes días tivemos unha visita moi especial nas aulas: o Apalpador chegou acompañado da Asociación Senda Nova, dentro do seu programa Espías do bosque. Grazas a esta iniciativa, a rapazada puido coñecer de primeira man algúns dos mamíferos máis representativos dos bosques galegos, descubrindo curiosidades e características sobre a súa vida e o seu hábitat.

Aproveitamos esta ocasión para, previamente, afondar no traballo de textos informativos, escollendo como protagonista a londra, un dos animais que máis interese espertaba. Con ela investigamos, escribimos e compartimos o aprendido durante a visita.

Como agasallo especial, tamén recibimos un libro para cada aula, vinculado co noso PDI e perfecto para continuar explorando a natureza que nos rodea.

Moitas grazas á Asociación Senda Nova por achegar a cultura do bosque ás nosas aulas e facelo da man dunha figura tan querida pola nosa tradición. Actividades como esta deixan pegada e fan da aprendizaxe unha auténtica aventura!

Recomendacións lectoras de Nadal

 Deixámosvos a continuación unhas recomendacións de lectura para este mes de Nadal. Agardamos que vos gusten e invitámosvos a compartir con nós que vos parecen. Boas festas!

Un día de convivencia e inclusión no Mercado Municipal

O pasado 3 de decembro, conmemoramos o Día Internacional das Persoas con Discapacidade cunha xornada de convivencia entre todas as escolas. Foi unha oportunidade única para reforzar valores de inclusión, empatía e traballo en equipo, colaborando da man da asociación "Un paso máis", que nos brindou unha serie de actividades deportivas accesibles para todos.

 

 

O Mercado Municipal converteuse nun espazo de encontro onde alumnado e profesorado participaron activamente en propostas adaptadas, desde xogos de habilidade ata disciplinas que puxeron a proba a cooperación e a superación persoal.

Esta xornada supuxo un espazo de encontro enriquecedor, no que cada actividade ampliou a perspectiva sobre a diversidade e reforzou os vínculos de compañeirismo, destancando o valor do deporte como ferramenta de integración.

Esperamos que iniciativas como esta sigan formando parte do noso día a día, creando espazos máis accesibles e enriquecedores para todos. Porque cada paso conta para construír unha sociedade máis equitativa!