Material para as letras galegas 25

A Real Academia Galega acordou dedicar o Día das Letras Galegas 2025 á poesía popular oral, personificado en Adolfina e Rosa Casás Rama, de Cerceda, Eva Castiñeira Santos, de Muxía, e Manuela Lema, Teresa García Prieto e Prudencia e Asunción Garrido Ameixenda, integrantes estas catro das Pandeireteiras de Mens (Malpica). Unha homenaxe colectiva a todas aquelas mulleres que, coa súa voz e saber transmitido xeración tras xeración, fixeron medrar o noso patrimonio cultural.

Desde o equipo de dinamización da lingua galega elaborouse unha presentación moi traballada para poder afondar sobre a temática.

Tamén vos deixamos por aquí unha pequena recomendación lectora para animarvos.

 

Convidámosvos a celebrar a nosa lingua, a nosa música e a nosa identidade agora e sempre.

ArRÓUPAme na igualdade

 Exposición de traxes tradicionais de Galicia

Os días 22, 23 e 25 de abril, a biblioteca do CRA acolleu unha interesante exposición didáctica de traxes tradicionais de Galicia, que permitiu á comunidade educativa achegarse á riqueza do vestiario galego.

Esta iniciativa formou parte do proxecto "ArRÓUPAme na igualdade", galardoado co Premio Concepción Arenal 2024, e buscou non só dar a coñecer os traxes típicos da nosa terra, senón tamén reflexionar sobre a súa evolución e o papel que xogaron na sociedade.

Durante tres días, os visitantes puideron explorar as distintas pezas expostas, aprendendo sobre os tecidos, os deseños e os usos de cada traxe segundo a época e o contexto social. O horario de visita foi de 12:00 a 14:00 e de 16:00 a 18:00. Foi unha experiencia enriquecedora, na que a tradición e a historia se entrelazaron para achegar á comunidade educativa un pouco máis sobre as nosas raíces.

 

Ademais disto os asistentes tiveron a oportunidade de realizar préstamo de libros, houbo quen reclamaba por levar as mans cheas deles.

Grazas por participar nesta actividade, agardámosvos na seguinte!

Xuntanza literaria: O CPI de Zas visita a escola de Cances

Despois da nosa marabillosa visita ao CPI de Zas hai uns meses, chegou a quenda de acollermos o seu alumnado na escola de Cances. Foi un día cheo de momentos especiais, onde a lectura e as artes escénicas volveron ser o fío condutor da convivencia.

Comezamos cunha sesión de lecturas compartidas, onde o alumnado da ESO do CPI de Zas e os nosos estudantes gozaron de historias que espertaron a imaxinación e fomentaron o amor polos libros. A continuación, o alumnado de Sísamo primaria, ofreceunos unha fantástica representación teatral do conto da Mosca Chosca.

 

Para rematar a xornada, todos xuntos compartimos unha deliciosa merenda e desfrutamos de xogos tradicionais que fortaleceron aínda máis os lazos entre os nosos centros.

O noso desexo é que estas xuntanzas continúen nos próximos cursos, porque cada encontro reforza a importancia de aprender en comunidade e de celebrar a maxia da lectura. Grazas ao alumnado e profesorado do CPI de Zas por esta experiencia tan enriquecedora. Agardamos a vosa próxima reunión!

Recomendacións lectoras de primavera

Aquí tendes as nosas recomendacións para esta luminosa estación primaveral. Libros marabillosos para acompañar os días de sol e as tardes de choiva. Gozade con eles e compartide connosco as vosas impresións!

Mochilas viaxeiras

Comezan a circular polas aulas as nosas mochilas viaxeiras. Chegará a todas as casas antes de que remate o curso, polo que agardade a vosa quenda para poder gozar delas. Cada unha leva: tres libros; un xogo de mesa; instrucións para o alumnado; e un caderno viaxeiro no que poderedes deixar comentarios, debuxos, fotografías e impresións sobre o seu contido e unha folla de recomendacións dirixidas ás familias para que poidades pedir prestados da biblio algún libro que vos interese.

Agardamos aproveitedes ao máximo esta iniciativa e que teñamos que mercar moitos máis libros, tanto para os nenos e nenas como para nós para poder seguir nutrindo estas mochilas.

Un saúdo e lede moito!

Exemplo de mochila viaxeira

Alice Guy: A pioneira do cine que a historia quixo esquecer

O Concello de Carballo invitou ao alumnado de 1º e 2º de primaria a unha actividade especial no Pazo da Cultura para conmemorar o 8M (Día Internacional da Muller), centrada na figura de Alice Guy, pioneira do cine e primeira directora da historia.

Tivemos a oportunidade de descubrir a vida e obra de Alice Guy, unha das primeiras persoas en entender o potencial narrativo do cine. Dirixiu e produciu máis de 1000 películas ao longo da súa carreira. A pesar diso, o seu traballo foi infravalorado e invisibilizado nunha industria dominada por homes, e moitas das súas contribucións foron atribuídas a outros cineastas.

Actividades coma esta axudan a reivindicar o seu traballo así como inspirar ás novas xeracións.

Antroidamos cos madamitos

Este ano, por terceiro ano consecutivo, desde o CRA reafirmamos o noso compromiso coa recuperación e posta en valor do Entroido tradicional, unha das festas máis arraigadas na nosa cultura. Para iso, contamos coa colaboración da Asociación Escola do Alprende de Oza, que leva anos traballando na comarca de Bergantiños pola recuperación desta celebración popular.

Esta asociación, con sede en Carballo, dedícase á ensinanza do baile e da música tradicional, así como á xestión cultural vinculada á nosa tradición. Nesta edición, lucíronse pezas recuperadas especificamente da parroquia de Cances, co protagonismo dos madamitos, figuras propias do Entroido local recuperadas grazas ao seu labor de investigación.

Foi unha celebración chea de diversión, identidade e música. Un paso máis na nosa aposta por manter vivas as tradicións e facer que formen parte da vida de toda a comunidade educativa.

Herbario de Rosalía: arte, natureza e poesía

Arte, natureza e poesía: flora e fauna de Carballo da man de Rosalía

Continuamos a encher os espazos de vida, cor e aprendizaxe. Grazas ao equipo de dinamización da lingua galega, inspirámonos no libro O herbario de Rosalía, unha obra que recolle a pegada da natureza na poesía de Rosalía de Castro, quixemos render homenaxe ás especies humildes que nos rodean, dándolles vida a través da arte.

Cada pincelada foi unha oportunidade para coñecer mellor as plantas do noso territorio, para traballar en equipo e para deixar pegada da nosa mirada sobre o mundo natural. O resultado nutre agora a nosa biblioteca, poñéndolle cor, xa que a arte tamén é unha forma de investigar, de expresarse e de coidar o que temos preto.

Grazas a todo o alumnado e profesorado por facer posible esta marabilla!

 

Achégate á biblio para ver o noso particular herbario!

Meco Rosaliano

O tempo de entroido xa chegou, descubride os mandadiños desta semana da man de Rosalía de Castro.

LUNS                     MARTES                    MÉRCORES                    XOVES                    VENRES

11F: Día Internacional da Muller e a Nena na Ciencia

O día 11 de febreiro conmemórase o Día Internacional da Muller e a Nena na Ciencia. O fin de darlle visibilidade a este día é o de conseguir unha maior participación das mulleres e as nenas en contextos científicos e así eliminar a brecha de xénero nos ámbitos STEAM (Ciencia, Tecnoloxía, Enxeñería, Artes e Matemáticas).

O Concello de Carballo puxo en marcha unha exposición titulada "Mulleres guerrilleiras: investigadoras de Carballo" á que vos podedes achegar ata o día 8 de marzo.

Durante este mes, no CRA Ponte da Pedra achegámos os experimentos científicos ás nosas aulas. Observamos a través do microscopio dixital, probamos a tensión superficial, vimos radiografías e mesmo probamos tintes naturais extraídos de plantas, toda unha aventura!

Ademais disto, tamén tivemos a oportunidade de facer unha visita a un dos museos científicos da cidade da Coruña, nada máis e nada menos que a Casa das Ciencias. 

Para poder ver outras actividades que se fixeron en distintos centros da nosa comunidade e atopar máis información, podedes consultar o blog das Bibliotecas Escolares de Galicia.

Agardámosvos na próxima publicación e esperámosvos experimentando.

Formación de usuarios

Temos moitas gañas de que conozades a fondo a nosa biblioteca. Deixámosvos unha pequena presentación do seu funcionamento.

 

Álbum do PDI

🍃 Xa temos o noso álbum de flora e fauna de Carballo! 🐾

É un pracer anunciar que o CRA Ponte da Pedra xa conta cun recurso moi especial para seguir coñecendo e valorando a contorna: o noso Álbum de Flora e Fauna de Carballo.

Este álbum nace como parte do noso PDI e está pensado para axudarnos a recoñecer, identificar e aprender sobre as especies máis destacadas do noso territorio. Cada imaxe vai numerada e pode pegarse no seu lugar correspondente, convertendo cada actividade nun pequeno reto de investigación e observación.

  

Ademais de ser unha ferramenta educativa, é tamén unha forma divertida de camiñar polo noso medio natural con ollos curiosos, recollendo pegadas de coñecemento en cada páxina. Nas últimas follas tamén poderemos engadir aquela flora e fauna que temos na contorna das escolas, temos todo un reto por diante.

Acompañádenos a e encher xuntos este álbum de descubrimentos!

Recomendacións lectoras de inverno

Quedan aquí as recomendacións para este frío mes de Xaneiro, gozade con elas e compartídenos a vosa opinión.